Për fatin e mirë të Skënder Gegës me Partizanin luan Bruno Telushi. Tekniku po i gëzohet perfomancave brilante të mesfushorit vlonjat, që me golin e dytë në tre javët e fundit, shtrin përtokë Kamzën dhe i con një tjetër mesazh teknikut të përfaqësueses Christian Panucci, në vigjilje të impenjimit të dyfishtë të kombëtares.
Të kuqtë, pa mbështetjen e tifozëve, treguan superioritet në mesfushë, ku Asani e Cinari dhënë një ndihmesë të cmuar. Kamza u kujdes më tepër të kontrollonte kundërshtarin në pjesën e parë, duke hequr dorë nga loja e zakonshme dhe ndoshta kjo i krijoi vështirësi skuadrës së Duros, që u vu në provë të vështirë në inserimet e mesfushorëve. Performanca e Kamzës u ndikua jo pak nga dëmtimi i dy qendërmbrojtësve Orelesi e Beqirit, që lanë prapavijën e Duros me problem.
Bardhi dha shenja komforte me rolin jo natyral për të, por zgjidhjen Partizani e gjen nga këmbët e Telushit. Avdyli ndalon tentativën e parë, por jo konkluzionin e dytë të vlonjatit, që feston, duke treguar qartë se është në shërbim të Gegës. Goli i dytë në tre javët e fundit për Telushin, që vazhdon të kandidohet për një thirrje në kombëtare.
Partizani kthehet të jetë hermetik në mbrojtje me ndeshjen e tetë në 11 javë pa pësuar gol. Të kuqtë fituan ngushtë, por treguan se ditën të vuajnë e të tregojnë karakter pas një humbje të rëndë si ajo me Skënderbeun: 25 pikë për skuadrën e Gegës që vihet në ndjekje të korcarëve një distancë larg, në pritje të ndonjë hapi fals …
