Vrasja e Konstandin Kacifas mbetet ngjarja më e debatuar në opinionin publik shqiptar dhe atë grek. Eurodeputetja Eleni Theocarus, pjesë e Grupit të Konservatorëve dhe të Reformistëve në Parlamentin Europian, ka vizituar shtëpinë e Kacifas.
Në fjalën e saj para gazetarëve të pranishëm, Theocarus u shpreh se ngjarjen e Bularatit e konsideron një vrasje dhe se dëshiron që kolegët e saj në Bruksel të dëgjojnë dhimbjen e nënës së 35-vjeçarit.
“Besoj se jemi përballë një dhunimi të madh të të drejtave njerëzore të komunitetit grek të zonës. Ngjarjen e konsideroj vrasje dhe dua që njerëzit që ndodhen në Bruksel të dëgjojnë zërin e të ëmës së Kaçifas. Sepse burgosja që mund t’i ndodhte të birit nuk krahasohet me dhunimin e të drejtave themelore të njeriut”.
Kurse babai i 35-vjeçarit Kacifas dëshmoi për gati dy orë në Prokurorinë e Krimeve të Rënda. Jani Kaçifas u thirr nga prokurori i çështjes, Njazi Seferi, për t’u marrë në pyetje lidhur me vrasjen e djalit të tij nga forcat RENEA të dielën e 28 tetorit në Bularat.
Babai i 35-vjeçarit mësohet se dha shpjegime në lidhje me kërkesën e familjarëve për të marrë trupin e djalit për varrim. Pyetja që iu drejtua Jani Kacifas nga përfaqësuesit e organit të akuzës ishte se “përse familja kërkon të tërheqë trupin nga Tirana, kur ndërkohë pak ditë më parë kërkonte ekspertizë të dytë mjeko- ligjore”.
Trupi i 35-vjeçarit ndodhet ende në morgun e Tiranës në pritje të përfundimit të ekspertizës së kërkuar nga Prokuroria e Krimeve të Rënda. Familjaret kanë kërkuar që procedurat të përfundojnë sa më shpejt për të kryer ceremoninë mortore.
