Pas vrasjes së minoritarit grek dje në Bularat të Gjirokastrës, kreu i PBDNJ-së Vangjel Dule ka bërë thirrje për ruajtjen e gjakftohtësisë.
Pak pasi shkoi për ngushëllim në familjen e Konstantinos Katsifas, Dule kërkoi para mediave transparencë për ngjarjen në fjalë, ndërsa shtoi se policia duhet të mbajë përgjegjësi.
"Cilat ishin rrethanat dhe nga kush u mor vendimi për të dhënë një vendim dhe një zgjidhje fatale? Në një kohë që ekzistonin mesa shprehen specialistë, mënyra të tjera që do të garantonin jetën e tij” - u shpreh Dule.
Kreu i PBDNJ shtoi se duhet të kryhet një ekspertizë mjeko-ligjore e përbashkët me shtetin grek si dhe duhet marrë mendimi i ekspertëve europianë.
“Policia e ka vënë vetë në pikëpyetje operacionin e saj të djeshëm. Duhet që të jemi të ndërgjegjshëm për pikëpyetjet që si në këtë rast, por edhe në rastet të tjera, çdo qyetar ka për policinë e vendit tonë. Në këto kushte është e domosdoshme që duke qenë se kemi edhe rastin e nënshtetësisë për të ndjerin, që ekspertiza mjeko-ligjore të jetë e përbashkët edhe me një ekspert nga shteti grek ku në të njëttin kohë ishte shtetas. Por në të njëjtën kohë kërkohet që këtij procesi t’i jepet besueshmëria të ketë garancinë dhe mendimin dhe vlerësimin e ekspertëve europianë”, - u shpreh Vangjel Dule.
