Komisioneri Publik ankimon vendimin e KPK-së i cili rikonfirmoi në detyrë Artur Malaj, gjyqtar pranë Gjykatës Administrative të Apelit Tiranë.
Vetë Operacioni Ndërkombëtar i Monitorimit rekomandoi ankimimin e vendimit të Komisionit të Pavarur të Kualifikimit të datës 3.8.2018
"Në vlerësimin e Komisionerit Publik, në rastin konkret, nuk krijohet bindja se subjekti i rivlerësimit ka deklaruar saktësisht dhe plotësisht pronat në përdorim apo posedim të tij dhe të personave të tjerë të lidhur me të, si dhe nuk ka arritur të argumentojë burimin e ligjshëm të pasurive dhe të të ardhurave të krijimit të tyre nga personat e tjerë të lidhur, me qëllim arritjen e një niveli të besueshëm të vlerësimit të pasurisë, sipas nenit 59/1, të ligjit nr. 84/2016" thuhet në njoftimin për media të Komisionerit Publik.
Komisioneri Publik,kërkon nga Kolegji i Posaçëm i Apelimit, që në përfundim të gjykimit të çështjes në seancë publike të vendosë ndryshimin e vendimit nr. 62, datë 3.8.2018, të Komisionit të Pavarur të Kualifikimit dhe të shkarkojë nga detyra subjektin e rivlerësimit, z. Artur Malaj.
