Kanë qenë përgjimet e një grupi kriminal që trafikonte lëndë të forta narkotike që ka çuar në pranga edhe dy deputetët socialistë Arben Çuko dhe Arben Ndoka.
Lapsi.al mësoi se nga përgjimet e këtij grupi kriminal është vënë re se Çuko merrte nga 1500 deri në 2000 euro për të transferuar apo për të dhënë leje për të burgosur të ndryshëm kur mbante detyrën e Drejtorit të Përgjithshëm të Burgjeve.
Nga këto përgjime u zbulua gjithashtu edhe roli i deputetit të Lezhës, Arben Ndoka. Arrestimi i tij u bë si pjesë e operacionit “Hipoteka” i akuzuar për tjetërsimin e disa pronave në plazhin e Tales dhe Ranës së Hedhun. Ndoka ka ushtruar presion të paligjshëm për të tjetërsuar pronësinë e këtyre pronave.
Në bazë të një informacioni që shpërndau policia e shtetit ditën e shtunë u njoftua se janë proceduar penalisht 11 shtetas (ish-punonjës në ZVRPP Kurbin dhe qytetarë përfitues toke), për falsifikime dokumentesh, shpërdorim detyre dhe pastrim të produkteve të veprës penale , duke tjetërsuar një sipërfaqe toke prej 68120 m2.
Përveç Ndokës janë arrestuar edhe 3 shtetas me masë sigurie "Arrest me burg", janë shpallur në kërkim 2 shtetas me masë sigurie "Arrest me burg " , janë proceduar në gjendje të lirë 4 shtetas, si dhe janë kryer veprimet për 2 të tjerë me masë sigurie "Arrest në shtëpi". ©LAPSI.al
