Policia e shtetit ka dhënë detaje për arrestimin e reperit të njohur Arkimed Lushanj i njohur me emrin e artit, “Stresi”. Për habinë e të gjithëve 31-vjeçari konsiderohet si një nga anëtarët e një grupi kriminal që operon në Tiranë në lidhje me aktivitetin e kundërligjshëm me tendencë “Trafikim narkotikësh” dhe “Krimeve kundër personit”.
Sipas të njëjtave burime hetimet janë zhvilluar nga Njësia Hetimore e Task Forcës Speciale Vendore Tiranë në Departamentin e Policisë Kriminale pranë Drejtorisë së Përgjithshme të Policisë së Shtetit. Për të riun e lindur në Tropojë dhe banues në Tiranë gjykata e kryeqytetit ka caktuar gjatë kësaj të mërkure masën e sigurisë "arrest me burg" për veprën penale “Prodhim dhe mbajtje pa leje të armëve luftarake”.
Të njëjtat burime thonë se Stresi ka qenë nën hetim për disa muaj nga policia dhe prokuroria për çështje si trafik droge dhe “krime kundër personit”. Gjatë arrestimit të Stresit në ambientet e një hoteli të ndodhur në Linzë gjatë kontrollit i janë gjetur dhe sekuestruar një sasi e vogël kokainë, një armë zjarri pistoletë e tipit “Pjetro Beretta” si dhe 12 fishekë të modelit 7.65 mm.
Stresi ka qenë në shoqërinë e një vajze 20-vjeçare me iniciale P.Ç. banuese në Tiranë për të cilën do të vazhdojë procedimi në gjendje të lirë e akuzuar për “moskallëzim krimi”.
Arkimed Lushaj njihet për disa probleme me drejtësinë edhe në të kaluarën. Ai është ndaluar në vitin 2012, ai u arrestua gjatë kohës, që po dilte nga një lokal nate, pasi me vete kishte një pistoletë pa leje. Pak muaj më parë, ai u shoqërua pasi ndodhej në një lokal në kryeqytet ku policia gjeti kokainë.
I bujshëm ishte dhe rasti i arratisjes nga ambientet e Komisariatit nr 3 në Tiranë duke shkaktuar një sërë shkarkimesh në radhët e uniformave blu. Arkimedi është djali i Sali Lushajt, një personi edhe ky i njohur për kohën kur ka punuar si truprojë e ish-presidentit Sali Berisha. ©LAPSI.al
