Autoritetet franceze, pas sinjalizimit të Uefa, kanë hapur një hetim paraprak në bazë të një dyshimi për një tentativë të kombinimit të ndeshjes mes PSG-Crvena Zvezda, në fazën e grupeve të Champions League fituar 6-1 nga Neymar e të tjerët. Një drejtues serb ka vënë 5 milionë euro për humbjen e skuadrës së tij me pesë gola diferencë, ashtu si më pas ndodhi në fushë.
Hija e basteve bie mbi Champions League. Në shënjestër ndeshja mes Psg e Crvena Zvezda, që u luajt në Parc de Prince në 3 tetor. Një ndeshje pa histori, dominuar gjithë kohën nga parisienët, në gol me Di Maria, Cavani, Mbappé e tre gola të Neymar. Uefa menjëherë ka njoftuar autoritetet franceze para ndeshjes, menjëherë sa mori sinjalin nga një informator identiteti i të cilit nuk bëhet i ditur.
Në Beograd, presidenti i nderit i Crvena Zvezdës, Dragan Dzajic, ka reaguar menjëherë: “Është një gënjeshtër”. Autoritetet franceze të lojërave online nuk kanë vënë re asnjë anomali në fluksin e basteve. Edhe Psg është distancuar duke u treguar madje i indinjuar. Për momentin nuk ka prova që ndeshja është trukuar.
