Pak muaj më parë, kur ende luante për Laçin askush nuk e kishte vënë re. E pra Myrto Uzuni luante njësoj si bën tani me fanellën e Lokomotivës së Zagrebit. Shpejtësi, fantazi, driblim, i kompletuar si sulmues krahu, finalizues i ftohtë si qendërsulmues, aftësi që për fatin e beratasit u shfaqën në Europë League, në atë gol që eleminoi Anorthosis dhe i bëri kroatët të bëhen konkretë në interesimin e tyre.
Pesë ndeshje aty dhe menjëherë thirrja për në kombëtare, e para për sulmuesin 23 vjecar. Pesë ditë nën urdhërat e Christian Panuccit dhe kaq mjaftuan që italiani të dashurohet me stilin e lojës së sulmuesit të tij të ri, nga i cili duket se nuk ka ndërmend të heqë dorë më, duke parë elozhet që i dha përpara ndeshjes me Jordaninë, në miqësoren që do të luhet në mbrëmje (ora 20.00) në Elbasan.
“Kam thërritur edhe Uzunin, që kaloi nga Laçi tek Lokomotiva e Zagrebit – vlerësoi Panucci -. Ka bërë aty 5 ndeshje dhe erdhi për të ftesa në kombëtare. E kam të rëndësishme të them se jam shumë i lumtur për këtë lojtar, sepse në grup nuk kemi askënd me karakteristikat e tij”.
Për sulmuesin, në këtë pikë, duket i pashmangshëm debutimi kundër Jordanisë, nuk ka rëndësi si titullar apo jo, por një paraqitje në nivelin e elozheve të Panuccit mund të bëjë që Uzuni të jetë karta surprizë edhe pas katër ditësh në Izrael.
