Duke prezantuar paketën për ‘Çlirimin e zgjedhjeve nga krimi’, Basha ka përmendur të fortët dhe bandat që PS ka angazhuar në zgjedhje dhe që i kanë mbledhur votat për Rilindjen e Ramës.
"Ngjarjet kriminale të javëve dhe ditëve të fundit, në tërësi, kanë pasur pa përjashtim një të përbashkët: Kudo ku ka krime të rënda, ka lidhje të autorëve me zgjedhjet. Bajrat e Shkodrës, kriminelë të rrezikshëm ndërkombëtarë, u kthyen në punëtorë elektoralë për PS. Përgjimet e tyre tregojnë se ata flasin më shumë me politikanë se me kriminelë. Nga Ditmir Bushati e drejtues të tjerë të kupolës në Tiranë tek politikanë socialistë në Shkodër.E njejta gjë në Elbasan, ku pushteti i krimit nga Çelajt tek Sanxhaktarët me shokë e Taulant Ballës dhe Qazim Sejdinit janë një e të pandarë dhe ku bandat janë kthyer në faktorin më të rëndësishëm zgjedhor.
Saimir Tahiri u lidh me krimin që në opozitë dhe u kthyer në nyjen kyçe të lidhjes së botës së krimit me kupolën rilindase. Më shumë vota Edi Ramës i sollën kriminelët e Tahirit me anë të kërcënimit e dhunës sesa fushata elektorale.
Në Durrës, bandat e Lul Berishës, Plarent Dervishit me shokë, qeverisin dhe kontrollojnë të gjithë aktivitetin e institucioneve vendore.
Në Vlorë kaluan nga banda e habilajve që kontrollonte gjysmën e Vlorës tek banda e Xhafës, që kontrollonte 100% të Vlorës, të tokës dhe detit.
Në Dibër, Ymer Lala.
Në Korçë, Rragami.
Në Tiranë, ndonëse në arrest e disa prej tyre në burg, ngë Emiljano Shullazi tek Dritan Dajti me shokë vazhdojnë të diktojnë vendimet politike dhe priten e presin nga qelitë e burgut, në audiencë, politikanë dhe kolegë të tyre të rrjeteve kriminale ndërkombëtare. Ky është fakt.
Prokuroria mban peng një sërë hetimesh ku vërtetohet se krimi ka qënë dhe mbetet një nga shtyllat zgjedhore të PS-së. Në Polici dhe në Prokurori ka regjistrime telefonatash dhe mesazhesh teledonike midis Vangjush Dakos dhe grupeve kriminale, midis Ulsi Manjës dhe grupeve kriminale, midis Damian Gjiknurit dhe grupeve kriminale, mes Taulant Ballës dhe grupeve kriminale dhe mes Edi Ramës dhe kriminelëve më famëkeq të vendit" u shpreh Basha.
