Opozita shqiptare është e përbërë thuajse nga të gjitha ngjyrat, të majtë e të djathtë, kristianë e republikanë, çamë e minoritarë grekë, një shumëllojshmëri e cila vjen “falë” vetëm një personi. Për Dashamir Shehin ky person është kryeministri i vendit, i cili sipas tij ka bërë bashkë të gjithë opozitën për të qëndruar në një linjë kundër tij. I ftuar në emisionin Top Talk, kreu i LZHK-së u shpreh se opozita mbahet sot në këmbë vetëm nga Edi Rama.
“Ditën që Rama nuk do të jetë më, opozita nuk do të jetë kaq homogjene. E kuptojnë që pushteti i Ramës është kaq abuziv, arrogant dhe antiligjor, sa që janë bashkuar njerëz që kurrë nuk do të bëheshin bashkë në kushte të tjera”, deklaroi kreu i Lëvizjes për Zhvillim Kombëtar (LZHK).
Shehi theksoi se marrëveshja që ka me Lulzim Bashën është e thjeshtë: të rrëzojë Edi Ramën. Gjithsesi, kryetari i LZHK-së pranoi se sistemi zgjedhor është defekt, por që do të diskutohet pas përmbushjes së qëllimit kryesor të opozitës.
