Kur kanë kaluar dy ditë nga përplasja me armë në zonën e “Ish-Bllokut”, ku mbeti i vrarë një person dhe u plagosën tre të tjerë, Policia ka në dorë dëshminë e njërit prej dëshmitarëve okularë.
Ngjarja ndodhi në lokalin “Monopol” në zonën e “ish-Bllokut” në orët e darkës së të enjtes, i cili ka pronar shtetasin Redi Popesku. Ky i fundit ka dëshmuar për oficerët e Policisë së Shtetit për aq sa ka parë dhe dëgjuar për konfliktin me armë që i mori jetën Fabian Gaxhës. Sipas Popeskut, ka qenë i fejuari i Elvana Gjatës, Ervin Mata, që ka kërkuar takim në lokal me Ervis Martinajn. Popesku thotë në dëshmi se mes të dyve kishte pasur një mosmarrëveshje, por, megjithatë, palët u takuan normalisht për ta sqaruar, deri sa ndodhën të shtënat krejt papritur. Ai konfirmon pistën e hetimit se gjithçka ka nisur pas një ngacmimi të Elvana Gjatës nga njëri prej pjesëtarëve të grupit të Ervis Martinajt. Popesku ka thënë se ka qenë Ervin Mata, i cili ka mbërritur në lokal i pari, i shoqëruar nga komando Meviol Bilo, Geldo Hoti dhe Fabio Alushi. Më pas, Mata kishte kërkuar që në lokal të vinte edhe Ervis Martinaj që të sqaronte mosmarrëveshjen për ngacmimin e këngëtares Elvana Gjata. Disa minuta më pas, në lokal kanë mbërritur Ervis Martinaj, Eljon Hate dhe Fabian Gaxha. Deri në këtë moment, sipas Popeskut, situata ka qenë e qetë dhe takimi mes Martinajt dhe Matës ishte normal, duke mos ngritur dyshime për përplasje. Mirëpo, konflikti ka nisur, sipas tij, mes Meviol Bilos dhe njërit prej shoqëruesve të Martinajt dhe aty situata është tensionuar.
DËSHMIA
“Dëgjova që mes dy grupeve kishte një mosmarrëveshje për një ngacmim ndaj së fejuarës së Ervin Matës. Ka qenë Ervin Mata, ai që më ka pyetur nëse kisha ndonjë problem me Ervis Martinajn, sepse ai do të vinte pas pak në lokal që të sqarohej me të për një çështje. I thashë se nuk kisha asnjë problem dhe në çast mbërriti edhe Martinaj, i shoqëruar nga Eljon Hate dhe Fabian Gaxha. Dua të them se Martinaj dhe Mata u takuan normalisht, duke mos ngjallur asnjë dyshim për ndonjë konflikt. Mirëpo, gjithçka ndodhi papritur, pasi njëri nga djemtë e Martinajt u konfliktua me komandon dhe aty situata degjeneroi në përdorimin e armëve”, mësohet të ketë thënë para Policisë Redi Popesku, pronari i lokalit “Monopol”, ku ndodhi përplasja. Ai tregoi se pas debateve verbale mes komandos dhe njërit prej shoqëruesve të Martinajt, konflikti u bë fizik dhe ka qenë Fabian Gaxha, ai që ka nxjerrë armën i pari, duke qëlluar në drejtim të komandos dhe ky i fundit iu përgjigj me armë. Gjithçka ndodhi brenda pak minutave dhe më pas u lajmërua Policia.
NGJARJA
Përplasja me armë ndodhi në zonën VIP të lokalit “Monopol” në zonën e “Ish-Bllokut” në Tiranë. Nga të shtënat mbeti i vrarë Fabian Gaxha, që shoqëronte Ervis Martinajn, si edhe mbeti i plagosur ky i fundit, së bashku me Eljon Haten. Dyshimet janë se sherri ka nisur për shkak të një ngacmimi që i është bërë këngëtares Elvana Gjata nga njëri prej të njohurve të Ervis Martinajt. Për këtë arsye, Ervin Mata ka kërkuar që të sqarohet me Martinajn në lokal për këtë mosmarrëveshje, por gjithçka ka dalë jashtë kontrollit. Komandoja Meviol Bilo është konfliktuar verbalist me shtetasin Fabian Gaxha, që ishte person me precedentë penalë dhe konflikti më pas ka përshkallëzuar deri në përdorimin e armëve. Fabian Gaxha ka mbetur i vdekur në vend, duke marrë një plumb në kokë dhe gjoks, ndërsa Ervis Martinaj është plagosur në qafë dhe Eljon Hata paraqitet në gjendje më të rëndë. Policia, në një njoftim zyrtar tha se kishte sekuestruar edhe një pistoletë të llojit “Glock”, që u gjet në lokal, ndërsa ka shoqëruar rreth 20 persona që mund të kenë dijeni për ngjarjen apo konfliktet e mundshme mes aktorëve të përfshirë në përplasje. Ndërkohë, janë sekuestruar edhe kamerat e sigurisë së mjediseve përreth dhe në hyrje të lokalit, për të mësuar më shumë për dinamikën e ngjarjes. Gjithashtu, Policia ka sekuestruar edhe 10 mijë euro, si edhe janë gjetur rreth 10 gëzhoja në brendësi të lokalit. Deri më tani, Policia ka shpallur në kërkim Ervin Matën, të fejuarin e Elvana Gjatës; Meviol Bilon, komando i spikatur, ndërsa është arrestuar ditën e djeshme, duke tentuar të largohej drejt Greqisë, shtetasi Geldo Hoti, i cili dyshohet se mund të ketë qëlluar me armë gjatë konfliktit mes palëve.
