Ish moderatorja e njohur e emisionit “Në shtëpinë tonë” Anjeza Maja, këtë sezon u largua nga Top Channel. Anjeza preferoi të mos fliste shumë për arsyet e largimit apo për planet e saj të ardhshme. Me takt, ajo vlerësoi ish bashkëpuntorët për profesionalitetin dhe marrëdhëniet e mira që kishte pasur në punë.
Prej disa javësh, është angazhuar në spektaklin e kërcimit “Dance ëith me” në Tv Klan dhe ndërkohë, për revistën ‘Class’ ka treguar se ka në dorë një projekt të ri, i cili do ta bëjë pjesë të stafit kryeministror.
“Së shpejti do të jem pjesë e stafit kryeministror. Është një projekt ambicioz i Endri Fugës dhe më pëlqen shumë si tokë e re në jetën time profesionale”- ka rrëfyer moderatorja për projektin të cilin mbetet ta mësojmë së shpejti.
Mbetet për t'u parë se çfarë mund të ofrojë moderatorja për mbarëvajtjen e punëve në kryeministri, apo projekti për të cilin ajo flet është pjesë e ERTV-së, televizionit privat të Edi Ramës, që përveç edicionit të lajmeve, intervistave në studio dhe etydeve të shkurtra, do ta pasurojë programin edhe me emisione gatimi.
