Në një dalje për mediet këtë të shtunë, deputeti i Partisë Demokratike, Gent Strazimiri ka kërkuar nga kryeministri Edi Rama që t’i tregojë publikut se çfarë tregojnë kamerat e Komisariatit të Fushë Krujës, për ngjarjet e ndodhura më 21 korrik.
Kjo datë ka të bëjë me denoncimin e nënkomisar Emiljano Nuhut, në kërkim të azilit politik jashtë vendit, i cili ka akuzuar deputetët Taulant Balla dhe Rrahman Rraja se ka qenë të pranishëm në komisariat, kur ai është kërcënuar me armë në kokë për të liruar Rexhep Rrajën, djalin e deputetit socialist të Krujës.
Deputeti demokrat pyet ndër të tjera se “çfarë po e detyron Ramën që të bëjë rolin e memecit dhe të mos flasë për filmimet në Komisariatin e Fushë Krujës, ku ndodhen të instaluara të paktën 8 kamera”.
“Edi Rama vazhdon të heshtë, sepse nuk guxon të thotë të vërtetën e pranisë së Taulant Ballës, Artur Bushit dhe Rrahman Rrajës në Policinë e Fushë Krujës më 21 korrik. Në këto 11 ditë, makineria e tij e propagandës shpiku 4 alibi për Taulant Ballën, që nga përurimet, deri te dalja për peshk ditën e 21 korrikut, por pengut të krimit Edi Rama ia ka mbyllur gojën një pyetje fare e thjeshtë: Çfarë tregojnë kamerat e Stacionit të Policisë së Fushë Krujës? Pse hesht Edi Rama prej 11 ditësh për përmbajtjen e pamjeve të 21 korrikut, që tregojnë kush ka hyrë e kush ka dalë nga zyrën e oficerit të policisë Emiljano Nuhu? Kush po e detyron kryeministrin tonë gojështhurur të bëjë rolin e memecit?”, pyet deputeti Strazimiri.
