Gjykata e Lezhës la në burg Endrit Vejsiun, 29- vjeçarin nga Tirana, i arrestur me disa mina me telekomandë dhe lëndë narkotike në makinë. Endrit Vejsiu është vëllai i prezantueses së njohur, Alketa Vejsiut.
29-vjeçari nuk ka thënë asnjë fjalë, duke mos dhënë shpjegime për ngjarjen, por ndërsa hynte në gjykatë ka parë të atin nga larg dhe i ka thirrur: "Mos u mërzit babi". Pikërisht në këtë moment, i ati, kur ka parë të birin në pranga dhe kur e ka dëgjuar t'i drejtohet me ato fjalë, ka shpërthyr në lot.
Gjykata vendosi burg pa afat për 29 vjeçarin, i cili pas seancës, është shoqëruar nga Policia drejt burgut të Shënkollit, ku do të qëndrojë në dhomat e paraburgimit të këtij institucioni deri në një vendim të dytë të Gjykatës apo deri në përfundim të hetimeve.
Endrit Vejsiu u arrestua në një operacion të koduar “Telekomanda”, pasi në gomën rezervë të automjetit, që drejtonte, iu zbuluan 4 mina me telekomandë dhe 3 kg drogë e dyshuar si kanabis sativa. Ndalimi i 29-vjeçarit u bë në aksin rrugor MilotLezhë, në kryqëzimin e Shënkollit, ku në mjetin e tij tip “Opel” në një gomë rezervë në bagazh, u gjetën të fshehura 4 mina me telekomandë.
Ato ishin të paketuara me nga dy cilindra materiali të ngurtë të mbështjellë me natriban, të dyshuara lëndë plasëse e llojit TNT. Gjithashtu, Policia sekuestroi dhe rreth 3 kilogramë lëndë e dyshuar narkotike kanabis sativa, e paketuar gati për shitje. Arrestimi i Vejsiut u bë për veprat penale “Prodhim dhe shitje e lëndëve narkotike” dhe “Trafikim i lëndëve plasëse”.
Nga ana tjetër, Policia e Lezhës pavarësisht se pretendon se e ka mbajtur nën survejim 29-vjeçarin nga Tirana, që solli dhe arrestimin e tij në kushtet e flagrancës, nuk ka dhënë asnjë informacion se ku do t’i shiste i riu katër minat me telekomandë apo dhe lëndën narkotike që po transportonte. Vetëm për lëndën narkotike, ai rrezikon nga 5 deri në 10 vite burg, kurse për veprën tjetër të lëndës plasëse mund të marrë një dënim nga 7 deri në 15 heqje lirie.
