Deputeti i PS-së, Rrahman Rraja ka thënë sot gjatë intervistës për 'Panoramen' se nuk ka qenë në komisariatin e Fushë Krujës dhe nuk është takuar me nënkomisarin Emiljano Nuhu, ndryshe nga çfarë pretendon ky i fundit. Deputeti mohon gjithashtu të ketë ushtruar presion apo ta ketë kërcënuar nënkomisarin.
"Ju faleminderit që më kontaktuat, por unë nuk e njoh fare këtë person dhe as kam shkuar ndonjëherë në zyrën e tij. As jemi takuar ndonjëherë. Gjithçka që ai thotë, janë sajesa, ndoshta për të përfituar azil politik", thote Rraja.
Ndërkohë Policia e Shtetit në deklaratën zyrtare të një dite më parë pranon takimin mes deputetit të PS-së dhe nënkomisarit.
“Takimi mes oficerit Emiljano Nuhu dhe shtetasit e pretenduar R.Rr. dhe R.Rr. në një lokal në Tiranë ka ndodhur. Por nga verifikimet e kryera pas kallëzimit të bërë nga Emiljano Nuhu në Komisariatin nr. 6 në Tiranë dhe më pas referuar në Prokurorinë e Tiranës, rezulton se ata njiheshim shumë më herët, që në kohën kur Nuhu ishte me detyrë në Policinë e Tiranës. Komunikimet e kryera midis tyre përmes aplikacionit ‘Ëhatsapp’ kanë qenë miqësore dhe pa kërcënime. Këto komunikime gjenden të administruara në dosjen hetimore”, thuhet në komunikatën e Policisë së Shtetit.
Pra, deputeti mohon të ketë njohje apo takim me nënkomisarin Emiljano Nuhu, ndërsa Policia e Shtetit pranon që ata janë takuar në një lokal në Tiranë dhe madje kanë shkëmbyer biseda në Whats App, të cilat janë pjesë e dosjes hetimore.
©LAPSI.al
