Pasioni për futbollin mbretëron në shtëpinë Bonucci, ndryshimi i vetëm janë ngjyrat e fanellës. Nëse Leonardo është kthyer të veshë fanellën bardhezi, djali Lorenzo nuk i ka braktisur kurrë ato të Torinos. Tifoz granata, Bonucci jr të hënën është stërvitur me moshat e skuadrës rivale të Juventus, duke shënuar madje edhe një 11 metërsh. I ati Leonardo e ka shoqëruar krenar në fushë dhe ka ndjekur seancën stërvitore.
I lindur në 2012 pas titullit të parë kampion të fituar nga Bonucci me Juventus, Lorenzo i vogël ka shkuar menjëherë kundër rrymës në familje, duke zgjedhur të bëjë tifo për Torinon. Idhulli i tij është Andrea Belotti, ai "Gjeli" të cilin nuk resht së imituari në lojërat që bën brenda mureve të shtëpisë. Belottin i vogli e ka takuar disa herë për shkak të miqësisë që ka mbrojtësi bardhezi me sulmuesin e Torinos dhe Lorenzo ëndërron që një ditë të luajë me fanellën e idhullit të tij.
Një dashuri për fanellën granata, të cilën nuk e ka fshehur kurrë, madje as në ditën e festimeve të titullit të fundit kampion të fituar nga i ati. I detyruar të zbresë në fushë me fanellën e Juventus, i trushtuari Lorenzo u bë simbol i shumë tifozerive. Tani, në fakt, mund të veshë fanellën e moshave të Torinos e në shtëpinë Bonucci do të jetë derbi për të gjithë sezonin.
