Kreu i Partisë Demokratike Lulzim Basha ka lënë diplomacinë duke ashpërsuar gjuhën për çështjen e shkëmbimit të territoreve Kosovë-Serbi. “Propozimi për shkëmbimin e territoreve është legjitimim i aventurierëve dhe legjitimim i pesë bandave të krimit të organizuar në veri dhe në jug të lumit Ibër”, u shpreh Basha.
Cilat janë këto banda kriminale që mbështesin shkëmbimin e territoreve? Kreu i demokratëve nuk përmendi asgjë konkrete, por shtoi se pretendimet për mosfunksionimin e territorit të Kosvës janë vetëm një alibi.
“Në qoftë se ka vullnet politik për të çmontuar këto pesë banda të krimit të organizuar në jug dhe në veri të lumit Ibër, atëherë alibia e fundit për mosfuksionim të territorit të Kosovës bie”, tha Lulzim Basha.
Këto deklarata vijnë një ditë pasi Kryeministri i vendit Edi Rama deklaroi nga studioja e emisionit “Opinion” se kjo është një çështje tejet serioze dhe është një moment historik që mund ti vijë Kosovës njëherë në 30 vjet.
Kryeministri citoi edhe ish-Presidentin Ibrahim Rugova që fliste për shkëmbim territoresh në vitin 1992, por nuk dha një përgjigje të qartë për qëndrimin e tij nëse mbështet këtë ide. Gjatë intervistës, Rama insistoi se korrigjimi i kufijve duhet të jetë një hap me një qëllim të caktuar që do ta çojë Kosovën përpara.
Propozimi për shkëmbimin e territoreve mes Kosovës dhe Serbisë është hedhur fillimisht nga Presidenti Hashim Thaçi. Por kjo ide është kundërshtuar nga kryeministri i Kosovës, Ramush Haradinaj, po kaq kundërshtohet dhe nga opozita në Shqipëri.
