Kreu i Vetëvendosje, Albin Kurti, ka mbajtur sot një konferencë për media, përmes së cilës ka ftuar të gjithë qytetarët, anëtarët e partive politike dhe organizatat që të marrin pjesë në protestën të cilën do ta organizojë Vetëvendosja me datën 29 shtator.
Sipas liderit të Vetëvendosjes, kjo protestë do të organizohet për ta mbrojtur Kosovën nga Presidenti Thaçi dhe se një popull nuk mund t’i nënshtrohet një njeriu.
Sipas tij Kosova po kalon një gjendje të rëndë dhe se Hashim Thaçi duhet ndalur, pasi ai nuk ka mandat për bisedime me Serbinë. Për kryetarin e Vetëvendosjes, gjithçka po bën Thaçi është një aventurë e tij personale.
“Situata politike në Kosovë është e rëndë, sidomos nga ndërmarrja e Presidentit Hashim Thaçi për dialog me homologun e tij presidentin serb, pa mandat nga Kuvendi, pa parime për dialogun, pa ekip gjithëpërfshirës. Kjo aventurë personale e Presidentit të Kosovës duhet ndalur. Ky president nuk ka as legjitimitet, as kompetencë e as kredibilitet”, tha Kurti.
Më tej ai shtoi se arsye për të protestuar është edhe situata e vështirë socio-ekonomike që po po kalon Kosova.
© LAPSI.al
