Është dënuar me burgim të përjetshëm nga gjykata e Kretës një 27-vjeçare greke e cila vrau me thikë përpara një viti një 35-vjeçar shqiptar. Vajza e re njihej si përdoruese droge dhe po bënte shumë zhurmë në banesë.
Shqiptari Valton Loka ishte fqinj i saj dhe duke dëgjuar zhurmat trokiti në derë për ta ndihmuar, por ajo e sulmoi me thikë duke i marrë jetën. Ngjarja e rëndë ndodhi më 11 nëntor 2017 në zonën Xeropotamou të Kretës. Vajza e pranoi krimin dhe kërkoi falje edhe gjatë seancës së sotme, duke deklaruar se nuk donte ta vriste.
"Unë nuk mund t'ju shoh në sy", - tha ajo, duke shtuar se viktima e kishte ndihmuar gjithmonë kur kishte pasur probleme dhe se kishin marrëdhënie të mira. Ajo tha se ditën e ngjarjes kishte konsumuar shumë heroinë dhe se nuk dinte çfarë po bënte. Në sallën e gjyqit foli edhe bashkëshortja e shqiptarit.
"Ajo vrau 4 persona! Burrin tim, mua dhe dy fëmijët tanë", - tha ajo mes lotëve.
Mediat greke shkruajnë se gruaja e ve shqiptare mbeti pa përkrahje me 2 fëmijët e saj pas vrasjes së bashkëshortit dhe për këtë shkak u largua në drejtim të Gjermanisë.
27-vjeçarja greke u dënua edhe me 4 vite burg për posedimin dhe përdorimin e armëve të zjarrit të paligjshme si dhe një gjobë prej 2 mijë eurosh. Mësohet se ajo kishte pasur edhe më herët probleme me ligjin, teksa ishte liruar me kusht për shkak se ishte e prekur me HIV/AIDS si dhe trajtohej për konsumim droge. ©LAPSI.al
