Dy ndeshje të rëndësishme, edhe pse njëra prej tyre është miqësore. Por emrat e kundërshtarëve nuk lënë vend për eksperimente dhe tekniku, Alban Bushi, nuk ka ndërmend të bëjë figurë të keqe. Në fakt në zgjedhjet e teknikut të përfaqësueses Under -21 kuptohet dicka edhe nga idetë e Christian Panucci në lidhje me Ligën e Kombeve dhe ndeshjen kundër Izraelit. Bushi ka bërë të ditur listën e futbollistëve të grumbulluar për takimin që do të zhvillohet në Kordoba, ndaj Spanjës, për Europianin 2019, por edhe miqësoren me Italinë. Vetëm 5 futbollistë në preferencat e Bushit luajnë në kampionatin tonë, ndërsa spikat grumbullimi i Kristal Abazajt dhe Ylber Ramadanit.
“Matematikisht jemi ende në garë për vendin e dytë në grup. Këtë radhë skuadra është e komplektuar. Jemi fizikisht shumë mirë. Do të bëjmë më të mirën tonë, duke njohur natyrisht edhe limitet tona, por edhe peshën e kundërshtarit në fushë. Edhe pse nuk futemi kurrsesi me frikë në këtë ndeshje”,- deklaroi Bushi.
Ndeshja zyrtare eleminatore Spanjë-Shqipëri do të luhet në datë 6 shtator, ora 20.00 në Cordoba, ndërsa takimi miqësor me Italinë, pas pesë ditësh në Cagliari, në datë 11 shtator, në orën 18.30.
