Ndërsa i afrohemi muajit tetor kur rinisin sërish aplikimet për Lotarinë Amerikane, bëhen publike të dhënat e atyre që aplikuan tetorin e shkuar. Shifrat janë të frikshme për një vend të vogël si Shqipëria. Rreth 367 mijë shtetas shqiptarë kërkojnë të largohen nga vendi në kërkim të ‘ëndrrës amerikane’. Ky është numri më i madh i aplikimeve në dhjetë vitet e fundit. Praktikisht Shqipëria është vendi i parë në Europë me rreth 17% të shtetasve të vetë mbi 20 vjeç, me të drejtë aplikimi, që duan të largohen drejt SHBA-së. Shifrat janë zyrtare nga Departamenti Amerikan i Shtetit. Pas uljes së ndjeshme të flukseve të mëdha për azil në Gjermani dhe refuzimit të kërkesave, shqiptarët shohin Lotarinë Amerikane si shpresën e vetme për t’u larguar.
Tabloja është shumë e trishtë për një vend të vogël si i yni, i cili është duke u zbrazur vit pas viti. Përse duan të ikin shqiptarët nga sytë këmbët? Dhe ata që aplikojnë për Lotarinë Amerikane apo orvaten të sigurojnë viza pune në vendet e BE-së, nuk janë njerëz krejt të zakonshëm. Por bëhet fjalë për persona të shkolluar dhe që minimalisht kanë një punë apo një status të caktuar. Nëse i referohemi shifrave të OKB-së, pritet që popullsia e Shqipërisë të përgjysmohet deri në fudn të shekullit. Politika, sistemi i drejtësisë, ekonomia, arsimi, punësimi, varfëria e shumë çështje të tjera po i detyrojnë shqitarët të largohen nga vendi i tyre. Ndonëse çdo ditë flitet për rritje ekonomike nga qeveria, për invenstime apo edhe rilindje, faktet tregojnë të kundërtën.
Shqiptarët nuk duan të rrimë më në këtë vend. Dhe po e bëjnë këtë në një eksod të madh, eksod i cili po e zhvesh Shqipërinë nga shqiptarët. Eksod për të cilin askush nuk po flet. Eksod i cili, me shumë mundësi është tragjedia më e madhe e këtyre 27 viteve tranzicion. Nga tetori në tetor, vit pas viti, numri i shqiptarëve që aplikojnë për Lotarinë Amerikane vjen duke u rritur.
Kjo nuk shpjegohet me ‘ëndrrën amerikane’, por papunësia, keqqeverisja, korrupsioni dhe shumë probleme të tjera që vijnë prej politikës, të cilat i detyrojnë shqiptarët të marrin rrugën. Në shtatë vitet e fundit, njerëzit që kanë ikur janë të barabartë, ose më shumë sesa numri i banorëve që ka qarku i dytë më i madh i vendit, Fieri, me 302 mijë banorë. Më pas renditet qarku i Durrësi me 285 mijë. Emigracioni, së bashku me rënien e lindshmërisë janë arsyet kryesore që po çojnë në tkurrjen e popullsisë.
Ende sot pas 27 viteve tranzicion, numri i atyrë që duan të ikin nga Shqipëria është ku e ku më i lartë sesa numri i atyre që duan të kthehen. Njerëzit po largohen sepse kanë intuitën të kuptojnë se çfarë po ndodh në Shqipëri, si dhe parandjejnë atë që i pret nëse vazhdojnë të jetojnë në këtu.
© LAPSI.al
