“Vesi del me shpirtin”. Edi Rama ka treguar shpesh shenja papjekurie. I fundit është ai i kësaj të shtune kur pati rastin të vizitojë “Juventus Stadium” për të ndjekur ndeshjen e bardhezinjve me Lazion. Megjithëse tha se ishte i ftuar i drejtorit shqiptar të Lazio, Igli Tare i harroi këta të fundit pasi postoi në rrjetet sociale një video me presidentin e bardhezinjve Andrea Agneli. Si një adoleshent ka ndarë në rrjetet sociale edhe një foto me yllin portugez Cristiano Ronaldo.
Me një buzëqeshje të stampuar në fytyrë, kryeministri shqiptar gëzohet si një fëmijë kur merr lodrën e premtuar të Krishtlindjeve. Por i gjithë ky udhëtim “blic” i kryeministrit shqiptar nuk kaloi pa polemika.
Pikëpyetje u ngritën mbi rrugën e zgjedhur nga kreu i qeverisë për të mbërritur në Torino.
Kuptohet që Rama ka zgjedhur rrugën më të shkurtër. Nga Vlora, ku mbajti për dy ditë një takim informal me ministrat, u nis me helikopter qeveritar për në Rinas ku e priste një avion çarter. Me të direkt e në Torino. Reagimeve online që shkaktoi ky akt i kreut të qeverisë iu përgjigj këshilltari i tij. Endri Fuga, drejtor i Komunikimit në Kryeministri i tha gazetës “Panorama” se Rama udhëtoi me çarterin e Igli Tares drejt Torinos, i cili i kishte siguruar një vend.
“Është plotësisht e vërtetë që kryeministri Edi Rama ka udhëtuar sot drejt Torinos, së bashku me Drejtorin Sportiv te Lazios, Igli Tare. Ata janë nisur nga Rinasi me një avion të prenotuar nga klubi i Lazios për drejtorin sportiv, Igli Tare. I cili pasi ka kaluar disa dite pushime në jug të Shqipërisë, është kthyer sot në detyrën e tij”, – ka thënë Endri Fuga.
Sipas tij, kryeministri ishte i ftuar më pas nga presidenti Agnelli, për ndeshjen e parë në shtëpinë e juventineve dhe do te kthehet në Shqipëri mëngjesin e së dielës. Gjithesi Fuga nuk thotë nëse Gjithesi Fuga nuk thotë nëse do të jetë sërish çarteri i Igli Tares që do ta kthejë kreun e qeverisë në atdhe. Fuga thotë se udhëtimet e kryeministrit të vendit i kanë kushtuar shumë më pak buxhetit te shtetit, sesa ato të paraardhësit të tij pasi Rama dhe ministrat udhëtojnë në Economy Class.
“Buxheti i shtetit nuk ka paguar asnjëherë për asnjë udhëtim privat apo familjar te tij” – thotë Fuga që shton se përdorimi i helikopterit është brenda orëve të detyruara vjetore të fluturimit që këto mjete kryejnë.
Këshilltari i Ramës kërkon të theksojë se kryeministri ynë nuk bën jetë luksoze, por në vendin më të varfër të Europës, ku mijëra persona nxirren nga skema e ndihmës ekonomike, ku të fusin në burg nëse nuk paguan dritat, ku të flakin në rrugë nëse nuk voton partinë në pushtet, ku nuk ka sindikata, ku vota blihet për një thes miell, fotoja e të parit të vendit me Cristiano Ronaldon pasi “ia kanë shtruar rrugën” me helikopterë dhe avionë privatë tingëllon si tallje me të gjithë. ©LAPSI.al
