Të mërkurën Kukësi ka përpara një mision të vështirë në Azerbaixhan kur të tentojë kualifikimin në ndeshjen e kthimit kundër Qarabag, me sfidën e parë të përfunduar pa gola. Rezultati është i hapur, edhe pse të paktën në letër favoritë janë azerët, por Blutë janë të motivuar për tu kualifikuar, duke marrë besim edhe nga 0-0 në ndeshjen e parë, ku pothuaj nuk rrezikuan asgjë.
Përballë do të jetë sërisht Ansi Agolli dhe për ish-kapitenin e Kombëtares rivali në fushë do të jetë Simon Rrumbullaku. Mbrojtësi i Kukësit ka bindjen se me kujdes mund t'ia dalin ndaj Qarabag, ndërsa nuk heziton të lëshojë sfidën me shqiptarin e Qarabag
"Agollin më vjen çudi kur e shoh kundërshtar në një skuadër të huaj, ketë ndjesi më dha ndeshjen e parë, tregon Rrumbullaku. Është një futbollist shumë i mirë, lojtar kombëtareje, një kapiten, por megjithë vlerësimin që kam do ta mund në fushë. Kualifikohemi ne", deklaroi mbrojtësi.
Kukësi nuk duhet të pësojë, për të patur shanset e tij në këtë ndeshje. Të paktën këtë ide ka mbrojtësi i djathtë, që shpreson shumë në minutat kur azerbaixhanasit do të humbasin durimin dhe do të lejojnë hapësira ku Blutë mund të godasin.
Në raundin e parë të Champions League Kukësi eleminoi Valetën me rezultatin e përgjithshëm 1-1, ndërsa pas barazimit të dytë rradhazi 0-0 në Loro Borici, skuadra e Cungut shpreson që edhe këtë herë kundër Qarabag kualifikimi të jetë në anën e tyre.
