Opozita e bojkotoi seancën plenare të së hënës duke kërkuar anulim të votimit të ligjit për Teatrin me pretendimin se në këtë proces ka votuar të enjten e javës së kaluar edhe deputeti i LSI-së Vangjel Tavo që mungonte.
Por kreu i deputetëve socialistë Taulant Balla publikoi në faqen e tij në Facebook dy video që sipas tij vërtetojnë se deputeti i LSI-së Edmond Panariti manipuloi procesin për votimin e ligjit të posaçëm për Teatrin Kombëtar.
Sipas Ballës duket qartë se si Panariti heq kartën e deputetit Robert Bitri (i larguar nga LSI) dhe në vendin e saj vendos një kartë tjetër që i përkiste deputetit të LSI-së Vangjel Tavo që mungonte në atë seancë. Balla thotë se kjo ka për qëllim njollosjen e procesit.
Pas këtyre akuzave ka reaguar ish-ministri Panariti që e sfidoi Ballën.
“Ftoj zotin Balla, te publikoje te plote videosekuencat e seances dhe veçanërisht momentin kur zoti Bitri, vjen ne seance edhe ulet ne postin e tij. Aty do te shihni qarte se si zoti Bitri, pasi ulet ne karrige, e largon karten e deputetit Tavo dhe perdor karten e tij. Vendosja e kartes se zotit Tavo ne postin e z. Bitri, ishte propozim per zevendesimin e tij ne formatin e grupit, pas largimit te tij nga LSI. Kjo është e verteta” – ndërsa në një tjetër postim shkruan: “Nuk arrij ta besoj!! Nje spekulim dhe mashtrim mjeran permendja e emrit tim si deformues i procesit te votimit. Ftoj kolegun deputet Robert Bitri, ne emer te integritetit te tij te deshmoje se ai e ka perdorur karten e tij te deputetit ne momentin e uljes ne vendin e tij dhe kjo eshte lehtesisht e provueshme... Kaq” – shkruan Panariti. ©LAPSI.al
