Prokuroria e Apelit për Krimet e Rënda i kërkon Gjykatës së Lartë masën arrest me burg në lidhje me ish-ministrin e Brendshëm, Saimir Tahiri. Deri tani, prokurorët nuk kanë arritur t'i bindin gjykatat e shkallëve më të ulëta për këtë masë sigurie. Maksimumi që arriti prokurori ishte një masë arresti në shtëpi për ish ministrin e Brendshëm edhe kjo për vetëm dy javë.
Ndërkohë, Tahiri kohët e fundit është rikthyer aktiv në rrjetet sociale, herë duke kalëruar e herë duke shuar kuriozitetin mes hojeve të bletëve nëpër fshatrat e Tiranës. Tahiri mund të konsiderohet tashmë krejt i shkëputur nga debatet politike të ditës, por nga sa duket prokuroria ende nuk e ka harruar të akuzuarin për trafik ndërkombëtar droge dhe shpërdorim detyre.
