Sekretari i përgjithshëm i NATO-s, Jens Stoltenberg, tha se pret që aleanca të vendosë të nisë zyrtarisht bisedimet e anëtarësimit me Maqedoninë në samitin e 11 dhe 12 korrikut.
"Pres dhe shpresoj që udhëheqësit e NATO-s në samit të vendosin për nisjen e bisedimeve të pranimit", u shpreh Stoltenberg.
Ky qëndrim i tij vjen pasi Maqedonia ka zgjidhur një mosmarrëveshje të vjetër të emrit me Greqinë, duke u pajtuar që të riemërohet Maqedonia e Veriut.
Në këmbim, Athina ka thënë se do të tërhiqet nga veto që e bllokonte anëtarësimin. Greqia do të mbështesë anëtarësimin e Shkupit në NATO dhe në Bashkimin Europian.
Greqia ka kërkuar prej kohësh që fqinji i saj verior të mos e përdorë emrin Maqedoni, duke argumentuar se një gjë e tillë sugjeron se ai ka pretendime për një krahinë veriore greke, që po ashtu quhet Maqedoni.
