Në mbledhjen e djeshme të 16 liderëve të Bashkimit Europian në Bruksel, nuk u arrit një marrëveshje konkrete mbi problemin që po shkakton vala e refugjatëve drejt Europës.
Megjithatë, kancelarja gjermane, Angela Merkel, u shpreh se pavarësisht dallimeve është arritur që shtetet të bashkohen për këtë çështje.
“Ne do të vazhdojmë të punojmë për zgjidhjen e këtyre çështjeve. Ka pasur shumë gatishmëri dhe pavarësisht disa dallimeve të vogla, kemi arritur të bashkohemi” - u shpreh Merkel.
Merkel ka bërë thirrje për takime para samitit të BE-së, i cili pritet të mbahet me të gjitha shtetet anëtare më 28-29 qershor.
Ajo është duke u sfiduar nga ministri i Brendshëm gjerman, Horst Seehofer, i cili ka kërcënuar me zbatim të kontrollit të njëanshëm në kufijtë e Gjermanisë, nëse nuk arrihet ndonjë marrëveshje mes shteteve të BE-së për refugjatët.
Hungaria, Polonia, Sllovakia dhe Republika Çeke, kanë thënë se do të bojkotojnë mini-samitin për shkak të kundërshtimeve të thirrjeve të vendeve tjera, kryesisht Gjermanisë, për të pranuar kuotën e migrantëve.
Merkel ka theksuar nevojën për solidaritet, duke thënë se nuk mund të përballen të vetme vendet ku hyjnë për herë të parë migrantët.
