Të detyruar të fitojnë. Brazili nuk është se ka shumë zgjedhje në Rusi 2018, sepse nisjen e Botërorit e bëri me një barazim që mund tia komplikojë rrugën drejt 1/8 në rast të një rezultati tjetër kundër kostarikanëve. Triumfues në 9 nga 10 përplasjet me Kosta Rikën, tre nga të cilat në Botëror, të vetmen humbje Selecao e ka toleruar në një miqësore që kostarikanët mezi e mbajnë mend: në mars të 1960. Nuk është një sfidë e barabartë në statistika, kualitet, apo histori, por Brazili për të përligjur statusin që zotëron, duhet të bëjë shumë më tepër se atë që tregoi në debutimin me Zvicrën.
Brazili më i mirë që nga 2002...
Tekniku, Tite, është liruar emocionalisht me konfirmimin se Neymar nuk ka pasur asgjë serioze në dëmtimin e dy ditëve më parë, kur u detyrua të braktisë stërvitjen. Numri 10 përvec 55 golave në 86 ndeshje me Kombëtaren, ka prekjen e tij në 52% të aksioneve gol të Selecaos. Nuk është se ka probleme për të arritur tek goli Brazili: 61% të kualifikueseve i ka mbyllur me më shumë se 3 gola dhe kjo vetëm sa konfirmon prepotencën ofensive të verdhejeshilëve. 4-3-3 me asnjë ndryshim, edhe pse Douglas Costa nxeh motorët në pritje të mundësisë. Tite ka në duar skuadrën më të mirë përfaqësuese të Brazilit, që nga 2002, por xhonglerët e Brazilit entuziazmuan vetëm një pjesë loje ndaj Zvicrës, ndaj dhe në Saint Petersburg 5 herë kampionët e botës zbresin me 1 pikë dhe të detyruar të fitojnë.
Kosta Rika dhe problemi i futbollit amerikano latin...
Vetëm një fitore ka marrë Kosta Rika kundër skuadrave të Amerikës së Jugut: atë kundër Uruguajit 4 vjet më parë. Ramirez nuk ka ndërmend të heqë dorë nga 5 mbrojtësit e tij, e në fakt nuk është se ka zgjedhje tjetër përballë skuadrës më ofensive të planetit. Tekniku i Kosta Rikës do ti besojë zgjedhje të tij të debutimit, edhe për faktin se ndeshja me Serbinë u vendos vetëm nga një goditje standarte. Marcos Ureña është favorit për të udhëhequr edhe njëherë sulmin kostarikan, por është në një provë edhe më të vështirë se ndaj Serbisë - tani i duhet të përballojë një mbrojtje të nivelit botëror. Kosta Rika do të mbrohet, e kjo është mëse normale, ashtu si 5 herë kampionët e botës kanë detyrimin të sulmojnë, sepse janë Brazili dhe asnjë tifoz brazilian nuk është mësuar të kualifikohet me frikë në zemër, apo me llogaritë për të shmangur kundërshtarë...
