Administratori i Përgjithshëm i kompanisë gjermane të prodhimit të makinave, ‘Audi’, Rupert Stadler është arrestuar sot në Gjermani si pjesë e një hetimi mbi mashtrimin e shkarkimit të gazeve.
Prokurorët e Mynihut thanë në një deklaratë se Stadler ishte ndaluar për shkak të shqetësimeve mbi provat e mundshme të manipulimit.
Nicolai Laude, një zëdhënës i kompanisë ‘VW’, që është kompania mëmë e ‘Audi’-t, konfirmoi se Stadler ishte arrestuar, por ai nuk pranoi të komentojë më shumë mbi hetimin, raporton CNN.
Ai tha se bordi mbikëqyrës i kompanisë do të diskutonte për këtë çështje ditën e sotme.
“Parimi i prezumimit të pafajësisë vazhdon të zbatohet ndaj z. Stadler,” shtoi ai në një deklaratë.
Arrestimi vjen vetëm disa ditë pasi Gjermania vendosi një gjobë prej 1 miliardë eurosh (1.2 miliardë dollarë) ndaj kompanisë ‘VW’ (VLKAY) për manipulimin e shkarkimit të gazrave të motorit të naftës të makinave të shitura në të gjithë botën.
