Pas vizitës së bujshme të çiftit presidencial të Francës, Emanuel dhe Brigitte Macron në Shtëpinë e Bardhë dhe takimit të përzemërt me Donald e Melania Trump, duket se mes dy krerëve të shteteve kanë nisur keqkuptimet e para.
CNN shkruan për një bisedë telefonike të tensionuar mes të dyve, gjatë të cilës mësohet se Macron e ka kritikuar shefin e Shtëpisë së Bardhë për politikat që po ndjek.
Siç ka mësuar CNN biseda mes tyre është zhvilluar të enjten e kaluar dhe përkon me ditën kur Shtetet e Bashkuara të Amerikës njoftuan se kishin vendosur tarifa për aluminin dhe çelikun që importohen nga Bashkimi Europian, Meksika dhe Kanadaja.
“Shkoi shumë keq. Ishte e tmerrshme”, i ka thënë një burim CNN-it në lidhje me bisedën.
“Macron mendoi se mund t’i thoshte atë që mendonte, duke u nisur nga marrëdhënia e tyre. Por Trump nuk duron dot ta kritikojnë”, ka shtuar burimi.
Nga ana tjetër Shtëpia e Bardhë me anë të një deklarate e cilësoi telefonatën Trump-Macron si një diskutim për tregtinë dhe emigracionin.
“Të dy liderët diskutuan mbi problemin e emigracionit nga Libia dhe mundësinë e zgjidhjes. Presidenti Trump theksoi nevojën për të ribalancuar tregtinë me Europën”, thuhet në deklaratë.
Nga ana tjetër në Elysée vendimi i SHBA-ve për tarifat u komentua si vendim i gabuar në disa drejtime. “Është i gabuar sepse prish balancat, duke shkaktuar fragmentarizim dhe nacionalizëm ekonomik”, thuhej në deklaratën zyrtare.
