Kristiano Panuçi po shtyn ditë të errëta në krye të kombëtares shqiptare. Dy humbjet e rënda, ndaj skuadrës amatore të Kosovës (3-0) dhe ndaj skuadrës së fortë të Ukrainës (4-1), e kanë zbehur shumë besimin tek ai. Pas ndeshjes në Evian të Francës tifozët e paktë e turpëruan publikisht duke ndërprerë intervistën e tij dhe duke kërkuar rikthimin e De Biasit. Qendërmbrojtësi veteran, Mërgim Mavraj e goditi skuadrën nga brenda duke deklaruar pas humbjes: “Janë shumë gjëra që nuk funksionojnë. Me thënë të drejtën, asgjë nuk funksionoi. Nuk ecën as sistemi, as mënyra e lojës, as lojtarët si paraqiten, as vullneti as pasioni siç kemi qenë gjithmonë”.
Më të rëndë gjendjen e ish mbrojtësit kampion të Milanit e bën fakti se ai pas humbjes katastrofike me skuadrën tjetër shqiptare, Kosovën, premtoi një ringjallje kundër Ukrainës. “Aty do ta shihni fytyrën e vërtetë të skuadrës” tha ai. Por këtë herë, pasi disfata qe po e të njëjtave përmasa, ai u mundua të fitojë kohë duke thënë se skuadra do të jetë gati në vjeshtë për ndeshjet zyrtare për lidhjen e kombeve.
A mundet ta bëjë? Njerëzit e botës së futbollit janë pesimistë.
Lexo më tej:
Mediat italiane: Panucci rrezikon shkarkimin nga Shqipëria
Analiza/ Panucci po ndërton apo po shkatërron, atë që ngriti De Biasi
Momenti kur tifozët e detyruan Panuccin ta ndërpresë intervistën pas humbjes nga Ukraina
“Mënyra se si po konceptohet loja është e gabuar. Ekipi është i çmobilizuar. Ajo që ndërtuam me shumë mund, po prishet. Skuadra po shpartallohet. Është situatë problematike” thotë Ervin Fakaj ish futbollist i kombëtares, tani në rolin e komentatorit në Digitalb. Ndërsa ish trajneri i kambëtares Neptun Bajko duke komentuar ndeshjen e Francës kundër Ukrainës thotë: “Ekipi ynë kombëtar pasqyroi një futboll statik, pa ide dhe, pavarësisht nga skema e fillimit të lojës 4-1-4-1, asnjë gjë nuk u pasqyrua nga përmbajtja e kësaj skeme në lojë. Pamë lojtarë të lodhur në mendim dhe në lëvizshmëri. Në fushë Shqipëria kishte lojtarë që nuk njohin lojën e njëritjetrit, lojtarë që nuk shprehin as fantazi dhe as teknikë individuale”
Këto dilema kanë bërë që disa të avancojnë në idenë e tyre për largimin e trajnerit Italian. Duke komentuar LIVE konferencën e tij të shtypit, ish tekniku tjetër i kombëtares Astrit Hafizi shpërtheu: “Nëse Panuçi largohet në këtë mënyrë nga intervista, atëherë unë mund të them të largohet dhe mos të kthehet më”.
Ndërsa në një koment për Panorama Sport, gazetari i lashtë sportiv me banim në ShBA, Adriatik Dosti lëshoi thirrjen: "Nuk mund të vazhdohet dot më duke eksperimentuar pa fund e turpërisht me një Kombetare që për ne shqiptaret ka kohë që me të drejtë po konsiderohet si e shenjtë… Ndaj Panucci më mirë largohu vetë se sa të largojnë shqiptarët siç dijnë vetëm ata…alla shqiptarçe”.
Faqja e pare e Panorama Sport me nje titull te madh qe ngre dyshime mbi aftesite e rreshter Panuçit
Nga ana tjetër vetë tekniku i kombëtares është munduar t’i ulë gjakrat duke u justifikuar se kishte mbi 7 mungesa në skuadër, një mbrojtje lojtarët e së cilës nuk aktivizohen më në ekipet e tyre dhe së fundi një grup që u ngrumbullua pas dy javësh pushime dhe nuk arriti t’i ndezi dot motorrët.
“Jemi pa Bashën, Xhakën, Memushajn, Grezdën, Sadikun. Mavraj ka 5 muaj që nuk luan, Memolla gjithashtu, kishte 5 muaj pa luajtur, Veseli nuk aktivizohet në skuadrën e tij” u justifikua ai.
Në ndihmë të pasardhësit të vet ka ardhur vetëm De Biasi, i cili i ka bërë thirrje mjedisit shqiptar që të krijojnë qetësinë e duhur dhe t’a përkrahin si trajnerin edhe presidentin e FShF-së.
Por, pikërisht këtu qëndron problemi. Hija e Xhanit të shqiptarizuar duket se do ta ndjekë nga pas italianin tjetër edhe për shumë kohë. Për çdo gjë që të bëjë ai do të krahasohet me De Biazin dhe me vajtjen e Shqipërisë në europian.
Një trjetër handikap është se kokën e Panuçit po e kërkojnë edhe të gjithë kundërshtarët e shpallur të Armando Dukës. Jo vetëm tifozët që thirrën në Evian për rikthimin e ish trajnerit, por edhe shumë të tjerë nuk i falin presidentit të FSHF-së, minimin që i bëri De Biazit në kulisa për t’a hequr qafe. Edhe ata e shohin Panuçin si një mjet për t’u hakmarrë ndaj Dukës.
Pikërishtë për këtë ish mbrojtësi i famshëm i Italisë gjendet në Shqipëri me një këmbë në varr. Atë mund ta mbajnë në jetë vetëm premtimet dhe basti që ka vënë: “në vjeshtë do të jemi ndryshe dhe do të kualifikohemi për në europian”.
Por edhe këtu besimi është krisur. Se edhe para ndeshjes me Ukrahinën, Panuçi e luajti këtë lojë premtoi shumë, por i zhgënjeu të gjithë.
©Lapsi.al
