Që nga dita që Partia Demokratike nxorri në media audio-përgjimin, ku thotë se është vëllai i ministrit, Geron (Agron) Xhafaj, bashkëbiseduesi tjetër Albert Veliu ka qëndruar i fshehur. Deri kur, policia e Kosovës e ndali në fshatin Shtime të Ferizajt, bashkë me të birin, për të cilin Veliu ka treguar se ka marrë kërcënime nga miq të Geron (Agron) Xhafajt dhe nga shefat e policisë në Vlorë.
Policia i arrestoi të dy, babë e bir ditën e dielë. Akuza për “kalim ilegal të kufirit” nuk duket e rëndë, megjithatë ka zbuluar vendndodhjen e "Babales", që siç duket është përpjekur të arratiset në fshehtësi, pa u zbuluar nga Ministria e Brendshme, që drejtohet nga Fatmir Xhafaj.
Fillimisht ndalimi i Veliut në Kosovë u prit me habi, pasi si prokuroria, ashtu dhe policia shqiptare nuk kanë asnjë pretekst ta ndalojnë ish skafistin vlonjat. Shkaqet e ndalimit u sqaruan më pas nga autoritetet kosovare, megjithatë ndjeshmëria e çështjes nuk e përjashton mundësinë e ndikimit nga Tirana.
Nuk është hera e parë që skafisti Albert Veliu ndalohet nga policia, që pas daljes së përgjimit, ku ai thotë se bisedon me Agron Xhafajn.
“Një natë në të gdhirë, mora një telefonatë dhe më thanë se kemi gjetur Babalen dhe do të të takojë ty, që t’i bësh një intervistë. Pyeta ku? Dhe më thanë tek Partia Demokratike. Shkova se mendova që intervista do të transmetohej në Ajsberg. Partia Demokratike vendosi ta publikojë vetë” ka thënë gazetari kur është pyetur për rrethanat se si u krye intervista me Albert Veliun.
Pasi mbaroi intervistën në selinë e PD-së, Albert Veliu u nis drejt Kosovës, por policia ia preu rrugën në mes. Në në lokal në Milot, rreth orës 04:00 të mëngjesit, policët e gjetën “Babalen” dhe e kthyen në Tiranë.
Kryerja e intervistës pas mesnate, lajmërimi në momentin e fundit të gazetarit tregojnë se skafisti kishte vendosur të fliste e të nisej sa më shpejt jashtë vendit, pa u kapur nga policia apo nga Xhafajt. Ai do të kishte arritur i qetë në Kosovë dhe më tej, sikur në të njëjtën ditë, Geron (Agron) Xhafaj të mos kishte përmendur emrin e tij në prokurori.
Kur u paraqit për të regjistruar një kampion zëri që do të krahasohet me atë në përgjim, vëllai i Ministrit të Brendshëm përmendi emrin e Albert Veliut, si njeriu që, sipas tij, kishte thurur skenarin për ta implikuar. Policia duket se e mbante nën vëzhgim skafistin, përderisa e ndaloi menjëherë, sapo prokurori kërkoi t’ia sillnin për ta marrë në pyetje.
Mediat pranë qeverisë kanë këmbëngulur gjatë këtyre ditëve mbi ekzistencën e një plant i të Albert Veliut, që ka si destinacion final një nga shtetet e Europës ku ai do të aplikojë pastaj për azil. Një alibi si e tij është një mundësi e artë për t’i dhënë fund andrallave të Shqipërisë dhe për të nisur një jetë të re në Perëndim, megjithatë deri tani, kjo mbetet një hipotezë.©Lapsi.al
