Departamenti amerikan i Shtetit ka udhëzuar stafin e tij në Kinë të njoftojnë për çdo tingull anormal apo probleme me shikimin që mund të hasin, pasi një nëpunës i Konsullatës së SHBA-ve në Guangzhou u raportua me simptoma misterioze.
Personi në fjalë pati “ndjesi të mprehta dhe të paqarta, sigurisht të pazakonta, të zhurmave dhe presionit”, thuhet në komunikatën e DASH.
Kjo nuk është hera e parë që stafi i ambasadave amerikane provon diçka të ngjashme. Shtetet e Bashkuara kanë denoncuar edhe më herët se diplomatët e tij në Kubë kanë pësuar simptoma të së njëjtës natyrë, pas një sulmi të dyshuar zanor të fortë.
Marrëdhëniet Kinë-SHBA janë tendosur së fundi, deri në atë pikë sa të kërcënohen edhe me një luftë tregtare. Gjithsesi, Shtetet e Bashkuara nuk e akuzojnë deri më tani Kinën, të fshihet pas këtij problemi.
Një zëdhënës i Ambasadës u tha medieve amerikane se nëpunësit kishin pësuar një lëndim të lehtë traumatik të trurit teksa punonin në Konsullatën amerikane në qytetin e Guangzhout.
“Nuk e dimë momentalisht çfarë i shkaktoi simptomat e raportuar, e nuk jemi në dijeni të situatave të ngjashme diku tjetër në Kinë, qoftë brenda apo edhe jashtë komunitetit diplomatik”, lexohet në deklaratën e DASH, që përktheu Top Channel. “Qeveria amerikane i ka marrë seriozisht këto raportime dhe ka informuar stafin zyrtar në Kinë mbi këtë ngjarje”, vijon më tej komunikata.
