Ishte një finale me zemër në dorë ajo e javës së fundit në Serie B në Itali. Frosinone që mbante vendin e dytë barazoi në shtëpi përballë Foggia duke pësuar një gol në minutën e 89-të.
Kjo i ka shkuar për shtat Parmës që me fitoren 2-0 në fushën e Spezia ngjitet në vendin e dytë i cili të çon direkt në Serie A.
Festë e çmendur për emilianët që një periudhë të shkurtër kohë janë drejtuar edhe nga biznesmeni shqiptar Rezart Taçi i cili tentoi të blinte skuadrën, por e la atë për shkak të borxheve të shumta.
Parma shpalli zyrtarisht falimentin në vitin 2015 duke zbritur në Serie D, por në 4 vite u ngjit sërish në kategorinë e më të mirëve.
Në Serie A rikthehet dhe Empoli i vendit të parë ndërsa do të luajnë play off për një vend Palermo, Venezia, Bari, Cittadella dhe Perugia.
Historia e çuditshme e Parmës
Parma ka historinë e saj të artë në vitet 1992 – 2002 kur arriti që në një sezon (‘96-‘97) të renditej në vendin e dytë të Serie A, të fitonte 3 Kupa të Italisë, një Superkupë të Italisë, 2 Kupa UEFA, 1 Superkupë të Europës dhe një Kupë të Klubeve Europiane.
Në vitin 2003, Parma u trondit nga një skandal i kompanisë “Parmalat” që e financonte klubin e cila falimentoi. Klubi i Parmës u vendos në një administrim të kontrolluar deri në janar të 2007-ës.
Në 19 dhjetor 2014, klubin e mori në dorë biznesmeni shqiptar Rezart Taçi, por sipas tij në atë moment borxhet kishin arritur në 200 milionë euro. Në atë kohë, Parma u bë klubi i tretë në Itali që merrej në dorë nga të huajt. President u emërua Emir Kodra. Drejtimi nga shqiptarët zgjati deri në shkurt 2015 kur Rezart Taçi ia shiti sërish aksionet e blera Giampietro Manentit për vetëm 1 Euro, aq sa ia kishte blerë pasi nuk mundi dot të sigurojë pagat e klubit që nuk ishte paguar që nga vera.
Parma ndodhej në fund të Serie A dhe presidenti Manenti u arrestua për pastrim parash dhe një sërë akuzash të tjera. Klubi u deklarua zyrtarisht i falimentuar më 22 qershor 2015 pasi askush nuk pranoi të paguante borxhet.
Po atë vit një grup biznesmenësh italianë e rithemeluan klubin me një kapital prej 250 mijë eurosh. Ata u dhanë mundësi edhe tifozëve të bëheshin aksionerë në klub duke pasur mundësi të blinin aksione për 500 euro duke shpërndarë 25% të tyre.
Në qershor 2017 klubi u ble në masën 60% nga një biznesmen kinez ndërsa 7 biznesmenët italianë mbajtën 30% të aksioneve. 10% i kanë ende tifozët. Hernán Crespo është zv.President i klubit. ©LAPSI.al
