Konflikti i ashpër i dy ditëve të fundit në Gaza ka lënë mbi 2200 persona të plagosur, dhe një pjesë e tyre nuk kanë mundësi të kurohen në spital. Qendrat mjekësore janë mbushur plot me të plagosur.
Nga përleshjet e dy ditëve të fundit 59 palestinezë kanë humbur jetën.
Numri i lartë i të vdekurve ka nxitur pakënaqësi kundër Izraelit për, siç është thënë, përdorimin e tepruar të forcës kundër protestuesve të paarmatosur.
Këshilli i Sigurimit i Kombeve të Bashkuara ka nisur sesionin e të martës me një minutë heshtje në nderim të të vdekurve, ndërsa i dërguari i posaçëm i Lindjes së Mesme ka thënë se “nuk ka justifikime për vrasjet”.
Turqia ka dëbuar ambasadorin e Izraelit ndërsa shumë shtete europiane kanë bërë thirrje për hetim ndërkombëtar.
Izraeli ka thënë se ka të drejtë të mbrojë kufirin e tij dhe komunitetet përreth, duke akuzuar grupin militant Hamas për organizim të sulmeve nën pretekstin e protestave.
Ambasadorja amerikane në OKB, Nikki Haley ka mbrojtur Izraelin duke thënë se asnjë shtet anëtar “nuk do të vepronte me më shumë përmbajtje se Izraeli”.
