Mediat britanike japin alarmin për rritjen e influencës së grupeve shqiptare në tregun e kokainës në Angli. Prestigjozja ‘The Times’ në një shkrim të gjatë shkruan ndër të tjera se bandat shqiptare po bëhen gjithnjë e më të dhunshme.
Shqiptarët kanë lidhje të fuqishme me kartelet e drogës në Amerikën Latine, duke bërë kështu që ata të marrin kontrollin e shumë qyteteve, thuhet në shkrim.
“Shqiptarët që kontrollojnë tregtinë me kokainë të pastër kanë rritur praninë e tyre në Britani me rreth 60% në tre vitet e fundit, duke ushqyer një rritje të krimit të dhunshëm”, shkruan “The Times”.
Mafia shqiptare rezulton të jetë e dytë pas Britanikëve në një renditje që është bërë nga NCA, duke lënë kështu pas rumunët që një vit më parë ishin në vendin e dytë.
‘The Times’ shkruan se mafia shqiptare ka marrë nën kontroll trafikun e kokainës në qytet të mëdha, por edhe në zonat rurale.
“Shtetasit shqiptarë qëndrojnë në Angli duke përdorur identitete të rreme. Impakti grupeve kriminale shqiptare na ka bërë që të punojmë me partnerët duke zhvilluar një sër operacionesh si përgjigje ndaj tyre” është shprehur për Gerry McLean, kreu Scotland Yard.
Duke iu referuar autoriteteve britanike, ‘The Times’ shkruan se është e vështirë të infiltrohesh në grupet kriminale shqiptare, pasi anëtarët e këtyre grupeve kanë dhënë besën ose premtimin për të mbrojtur me jetë njëri-tjetrin. Gazeta përmend këtu qëndrimet e Theresa May dhe Michael Gove përpara referendumit të Brexit, të cilët thonin se në Britani do të dynden shumë gangsterë shqiptarë nëse Shqipëria i bashkohet Bashkimit Europian në vitin 2025.
Sipas ‘The Times’ shumica e kriminelëve shqiptarë që janë në Britani kanë hyrë në ishull duke u identifikuar si shtetas kosovarë. Më pas në shkrim evidentohen disa shtetas shqiptarë të përfshirë në trafik droge, të cilët ekspozojnë jetën e luksit në rrjetet sociale, duke ia lehtësuar më shumë punën oficerëve të policisë.
