Facebook duhet mbyllur. I këtij mendimi është Vitorino Andreoli, psikiatër, shkrimtar dhe drejtues i Departamentit të Psikiatrisë në Verona-Soave, po ashtu edhe anëtar i Akademisë së Shkencave të Nju Jorkut. Në një intervistë për “Il Giornale”, Andreoli nuk i kursen kritikat ndaj rrjeteve sociale, që i konsideron e keqja e kohëve moderne.
“Facebook duhet mbyllur. Ne kemi humbur individualitetin, besojmë se kemi një fuqi që në të vërtetë nuk ekziston. Individi nuk është te ajo që tregon aty, por në atë që nuk thotë. Ndërsa mediat sociale na shtyjnë të themi gjithçka, duke na banalizuar. Rrjetet sociale janë një nevojë për të ekzistuar sepse kemi vdekur. Ato krijojnë një mjedis kompensues për njerëzit e frustruar. Kur nuk dimë të bëjmë dallimin mes virtuales dhe reales, atëherë kjo është diçka e rrezikshme. Realiteti virtual shtrihet edhe në jetën reale, hyn në shtëpitë tona”, thotë ai.
Andreoli thotë se më të brishtë ndaj këtij fenomeni janë të rinjtë.
“Jam shumë i shqetësuar. Nuk jemi në gjendje t’i ndihmojmë. Mungojnë shembujt e prindërve, që edhe ata kanë nevojë të mos ndihen të frustruar. E keqja nuk është kurrë në numrin shumës. Ka diçka që nuk shkon në nivelin social”, thotë ai.
Për psikiatrin e njohur, sëmundja më e përhapur nuk është depresioni. Ai i shton diçka më shumë këtij pohimi. “Është të ndierit i palumtur, fatkeq. Si mund të jemi të lumtur? Ne jetojmë në frustracion, që akumulohet dhe gjeneron zemërim. Dhe ky i fundit gjeneron dhunë”, thotë ai.
Sipas tij, një nga “patologjitë” që mbërthejnë njeriun modern është mania për pushtet. “Pushteti është sëmundje sociale”, thotë ai.
Edhe në lidhje me lumturinë, Andreoli ka një qëndrim tjetër nga ai i zakonshmi.
“Unë vetë jam një i palumtur i gëzuar. Lumturia ka të bëjë me unin, është perceptimi që dikush ka përballë diçkaje pozitive që ka të bëjë me të. Ndërsa gëzimi na përket neve, korit. Është diçka kolektive, jo egoiste. Pikërisht ky (gëzimi) është i mundur”, thotë ai.
