Goli i parë fshiu çdo iluzion. Tek i dyti duhet mbajtur fryma sepse ka hyrë që tashmë në historinë e Champions League. Cristiano Ronaldo, gjithmonë ai, edhe këtë herë fshiu shpresat e Juventusit për një “hakmarrje” duke e tërhequr Real Madrid drejt gjysmëfinales së 13-të radhazi.
Nuk pati ndeshje, nuk pati histori, nuk pati përballje. Spanjollët janë një ekip i çmendur që luan një futboll krejt tjetër. Inteligjenca e Modric, forca e Kroos, lëvizjet e lirshme të Isco dhe golat e Ronaldo. Nga një në çdo pjesë i shënoi Juventusit në Torino. Arrin në 39 gola në këtë sezon (Juventus është viktima e tij e preferuar). 24 gola në 12 ndeshjet e fundit. Gaboi vetëm një goditje në fund të ndeshjes si për të treguar se edhe ai është njerëzor.
Goli i parë ishte fatal. U shënua pas 166 sekondash, goli më i shpejtë në Allianz Stadium të Juventusit në historinë e Champions.
I dyti, një roveshiatë nga mesi i zonës ishte kaq i bukur sa mori me meritë të gjitha duartrokitjet e tifozëve italianë. Një gjest i rrallë në Itali ku juventinët u ngritën në këmbë.
Golin e tretë e gjeti Marcelo si për të vulosur kualifikimin dhe minimizuar shpresat për një mrekulli në ndeshjen e kthimit në Madrid.
Edhe 10 muaj pas finales së Kardifit, Real mbetet skuadër e një tjetër planeti. Diferenca, njëlloj si atëherë është e dukshme. Juve u godit nga lojtarë që ditën të bënin diferencën si CR7, apo dhe kroset perfekte të Marcelo dhe Isco. Kampionët bënë diferencën, por juventinët e bënë në sensin negativ. Dybala del me karton të kuq vetëm 2 minuta pas golit të dytë të Ronaldo. Higuain e provoi, por nuk i ndezi. Champions mbetet një kupë e mallkuar për italianët.
Dështim në skemë?
Allegri zgjdhi një formacion 4-4-1-1 me Asamoah tercin, Alex Sandro në rolin e “ala” bashkë me Douglas Costa dhe Matuidi në pankinë. Një skuadër e mbledhur dhe kompakte që duhet të vinte në vështirësi mbrojtjen e Real Madrid ku është edhe pika e dobët (nëse mund të thuhet) e kësaj skuadre.
Goli i parë i goditi në zemër italianët, që gjithsesi më pas e provuan të kthenin barazpeshën. Kërkuan me ngulm edhe penalltinë, por arbitri nuk dëgjonte në atë anë. Juves i mungoi konkretizimi, saktësia dhe ftohtësia. Navas duket si gjigant ndërsa Sergio Ramos një bllokues preciz i goditjeve të Dybala.
Zidane zgjodhi Isco, një trekuartist atipik që niset nga e majta dhe hyn në qendër për të gjetur Ronaldo dhe Benzema. Mesfusha e Real është në superioritet dhe në çdo aksion është e rrezikshme. Juves i munguan hapjet e Pjanic dhe lëvizjet e shpejta të Douglas Costa që u pa shumë i ngadaltë dhe i kuptueshëm. Një frymëmarrje i dha Khedira me kalimin e minutave, por pa mjaftuar për të përmbysur spanjollët. ©Marrë nga Corriere della Sera/ Përgatiti LAPSI.al
