Presidenti turk, Rexhep Taip Erdogan, deklaroi se Kryeministri i Izraelit, Benjamin Netaniahu është një terrorist, i cili merr toka nën kontroll si pushtues.
Shkak për këto akuza është bërë konflikti i rinisur dy ditë më parë në Rripin e Gazës, ku ushtria izraelite qëlloi për vdekje 16 protestues palestinezë.
“Netaniahu, ne nuk kemi përsipër turpin e pushtimit. Ti je një pushtues. Ke marrë toka nën kontrroll si pushtues. Në të njëjtën kohë je terrorist. Edhe shteti i Izraelit është terrorist, pasi është shumë e qartë ajo që ndodhi në Gaza. Është e qartë ajo që ndodhi në Jeruzalem.”
Netaniahu nuk vonoi të kthente përgjigje. Kryeministri i Izraelit deklaroi se nuk ka nevojë për leksione demokracie nga një person i cili për vite me rradhë ka bombarduar pa mëshirë civilët.
Duke shfrytëzuar edhe 1 Prillin, Netaniahu shtoi se Erdogan e festoi kështu ‘Ditën e Gënjeshtrave’.
