Ish-kandidati për kreun e FSHF-së, Bashkim Fino ka reaguar pas lajmit se gjykata nuk ka regjistruar zgjedhjet për presidentin e këtij institucioni duke mos e pranuar fitoren e Armand Dukës.
Gjykata e Tiranës nuk ka pranuar të regjistrojë zgjedhjet duke konstatuar shkelje me listën e anëtarëve që votuan më 7 shkurt. Gjykata e Tiranës vendosi të mos regjistrojë as vendimet për kreun e FSHF-së dhe për anëtarët e Komitetit Ekzekutiv. Tani Bashkim Fino thotë këto shkelje ai i konstatoi që gjatë procesit.
“Pasi konstatova dhe denoncova publikisht paligjshmërinë e funksionimit të FSHF, mënyrën se si i manipuluan zgjedhjet, duke futur persona të pautorizuar dhe shoqata te paregjistruara, bashkë me stafin tim, vendosëm të ndjekim rrugën ligjore. Kisha besim te drejtësia dhe ajo u shpreh sot, duke mos e regjistruar Asamblenë Zgjedhore të datës 7.02.2018.
Përshëndes shpresën që dha sot drejtësia, që çdo manipulim, nuk do ketë sukses para ligjit. Ky ishte një mesazh për të gjithë viktimat e këtij sistemi, që Armand Duka nuk kanë për të pasur më sukses me metoda të paligjshme. Procesi vazhdon edhe në KAS-in shqiptar dhe sidomos në Gjykatën e Arbitrazhit Sportiv në Lozanë. Për një futboll të pastër dhe të drejtë!” - thuhet në reagimin e Finos. ©LAPSI.al
