Vjen reagimi Skënderbeut pas dënoimit të rëndë të UEFA-s me 10 vite përjashtim dhe 1 milion euro gjobë. Klubi korçar thotë se vendimi ishte i pritshëm pas raportit të bërë nga 2 inspektorët e UEFA-s, por konsideron atë me të meta serioze në lidhje me parimin e pavarësisë institucionale dhe garantimin e të drejtave procedurale të palëve.
“Përpara këtij vendimi, e vetmja mënyrë për KF Skënderbeun për të mbrojtur punën shembullore të klubit dhe krenarinë e komunitetit sportiv korçar e kombëtar mbetet apelimi në CAS dhe në Gjykatën e Lartë Federale Zvicerane” – thotë Skënderbeu që nuk i kursen akuzat edhe ndaj UEFA-s.
“Është e qartë për të gjithë shqiptarët se drejtësia sportive e UEFA-s është tërësisht në funksion të interesave striktërisht private të këtij institucioni dhe të partnerëve të tij” – thuhet në reagim.
Klubi thotë se është krenar për sukseset historike, të cilat sipas tij janë produkt i meritave, mundit dhe sakrificave.
“KF Skënderbeu mbetet besimplotë se drejtësia e pavarur sportive ose civile do të konfirmojë pafajësinë tonë dhe do të rrëzojë vendimin absurd të Komisionit të Kontrollit, Etikës dhe Disiplinës të UEFA-s. Çmojmë se e vetmja arritje e UEFA-s përmes këtij proçesi është vrasja e kredibilitetit dhe integritetit të këtij institucioni në komunitetin sportiv ndërkombëtar” – e mbyll reagimin e tij Skënderbeu. ©LAPSI.al
