Të paktën 64 persona kanë humbur jetën në një zjarr që përfshiu një qendër tregtare dhe kompleks argëtimi në qytetin siberian të Kemerovos, të njohur për qymyrgurin.
Shumica e viktimave janë fëmijë, ndërsa 10 persona të tjerë vijojnë të rezultojnë të zhdukur.
Zjarri nisi në katin e sipërm të kompleksit “Winter Cherry”, gjatë pasdites së të dielës me orën lokale. Dyqanet, kinematë dhe ambientet e tjera argëtuese të qendrës tregtare ishin të mbipopulluara në momentin e tragjedisë.
Videot e publikuara nëpër rrjetet sociale treguan njerëz që hidheshin nga dritaret për t’iu shpëtuar flakëve.
“Sipas të dhënave paraprake, çatia është shembur mbi dy kinema”, thotë Komiteti rus i Hetimit, në një deklaratë.
Shkaku i zjarrit nuk dihet ende, por autoritetet kanë nisur një hetim për ta përcaktuar atë.
Deri më tani janë arrestuar 4 persona për t’u marrë në pyetje, përfshi kreun e kompanisë që menaxhonte qendrën tregtare, sipas asaj që bën të ditur Komiteti Hetimor. Pronari i kompleksit “Winter Cherry” është mes të arrestuarve.
Zjarri nisi rreth orës 17 të pasdites së të dielës me orën lokale, ndërsa një personel emergjencash prej 660 vetësh u dërguan në vendngjarje në përpjekje të ethshme shpëtimi. Zjarrfikësit thanë se ndërtesa ishte ende duke u djegur edhe sot, teksa shihnin tym që dilte nga struktura e mbetur e godinës, që rrezikon madje edhe shembjen.
