Ish-ministri i Mbrojtjes i Partisë Socialiste, Luan Hajrdaraga, ka pësuar sot një ishemi në tru dhe ndodhet i shtruar në spital në Tiranë.
Bëhet me dije se Hajdaraga, ka qenë në pikën kufitarë të Qafë Thanës, duke u kthyer në Shqipëri kur ka pësuar isheminë. Hajdaraga jep mësim të enjteve në Strugë, dhe ditën e sotme ishte nisur drejt Tiranës kur gjendja iu përkeqësua.
Po ashtu burimet bëjnë me dije se ish-ministrit socialist i është dhënë ndihma e parë në mënyrë urgjente, për t’u nisur më pas drejt Përrenjasit, ku e priste helikopteri që do e sillte drejt spitalit të kryeqytetit.
Ka qenë kreu i Grupit Parlamentar të PS, Taulant Balla i cili është kujdesur për transportimin e Hajdaragës drejt Tiranës, konfirmojnë burimet për gazetë Panorama. Por, udhëtimi ka qenë i vështirë. Kjo për shkak të motit të keq. Mësohet se udhëtimi i tij drejt Tiranës ka qënë thuajse e detyruar pasi neurokirurgjia në Tiranë është më e specializuar se në Maqedoni.
Për momentin Luan Hajdaraga ndodhet në ambientet spitalore në Tiranë, ku dhe po merr shërbimet e nevojshme për stabilizimin e parametrave jetësore.
Hajdaraga ka qenë ministër i Mbrojtjes së Shqipërisë gjatë viteve 1998-2000, përfshi këtu edhe kohën e luftës në Kosovë.
