Pas një fitoreje që nuk habiti askënd, Vladimir Putin, duke folur para njerëzve në Moskë, përmendi edhe kohën kur ai mund të largohet nga udhëheqja.
“Nuk do rri në detyrë kur të jem 100 vjeç”, u dha Putin, “lajmin e mirë” rusëve që shpresojnë për vendosjen e një demokracie funksionale në vendin e tyre.
Ashtu siç pritej nga e gjithë bota, në zgjedhjet e djeshme presidenciale që u zhvilluan në Rusi nuk pati asnjë surprizë. Nga votat e numëruara deri mbrëmë në mesnatë, Vladimir Putin ka siguruar një fitore absolute, madje edhe më të madhe se ajo, me 64% të votave që mori në vitin 2012.
Putin pasohet nga milioneri komunist Pavel Grudinin. Në garë ishin edhe gazetarja Ksenia Sobchak dhe nacionalisti i njohur, Vladimir Zhirinovsky, ndërkohë që rivali i vetëm serioz opozitar, Aleksei Navalny, u përjashtua nga gara.
