Duke folur për 180 milionë eurot e drogës së kapura pak ditë më parë kreu i PD-së Lulzim Basha ka theksuar se jo vetëm ky trafik nuk mund të bëhej pa bekimin e qeverisë, por ai këmbënguli se socialistët kanë gjetur edhe mënyrën e pastrimit të parave të këtij trafiku që po vdes çdo lloj biznesi tjetër në vend (50 % biznese të mbyllura këtë fillim viti tha ai). Pasi ka nënvijëzuar se skema përsëritet gjithmonë njësoj, se kapen vetëm peshqit e vegjël apo shoferët dhe mbeten anonimë (si në rastin e Xibrakës) kokat e trafikut Basha ka akuzuar edhe bashkinë e Erion Velisë si mekanizmin e pastrimit të parave të këtij biznesi kriminal. “Jo më kot gjatë këtij mandati janë dhënë plot 167 leje ndërtimi kur Tirana është e ngopur me apartamente” ka thënë Basha. Sipas të dhënave të parashikuara nga buxheti i këtij viti i bashkisë së Tiranës (nxjerë nga taksa e ndikimit në mjedis), parashikohen të investohen në industrinë e ndërtimit afro 300 milionë euro. Pyetja që shtrojnë specialistët është: Nga dalin këto para kur dihet se bankat kanë frikë t’a kreditojnë industrinë e ndërtimit?
Pikërisht kjo pyetje që prej kohësh qëndron pa përgjigje e ka bërë kryetarin e opozitës që sot në parlament të ngrejë hipotezën se qeveria jo vetëm e suporton biznesin kriminal të drogës, por ajo i ka ofruar atij mundësinë edhe të pastrojë paratë e tij përmes lejeve të ndërtimit në Tiranë.
©Lapsi.al
