Pak ditë më parë, kryetari i Bashkisë së Tiranës, Erion Veliaj inauguroi një korsi të re biçikletash. Pista në mes të bulevardit Zogu i Parë është ndryshe nga të tjerat, sepse kalon mes dy korsive të makinave.
“Nën hijen e pemëve e me një sinjalistikë moderne” shkroi Veliaj në Facebook, ku postoi 36 foto që pasqyrojnë aktivitetin e inaugurimit të pistës. Në të njëjtin mesazh nga Facebook, Erion Veliaj i fton qytetarët ta provojnë vetë pistën e re dhe më pas t’i vënë një notë.
Nga fotot që ka shpërndarë Veliaj duket vërtet një super-pistë, por 36 shkrepjet e aparatit lënë jashtë fokusit gjendjen e rrugës në të dy anët e pistës së biçikletave.
Korsitë e makinave në bulevardin Zogu i Parë u shtruan me pllaka të kuqe më shumë se dhjetë vjet më parë, kur kryetar bashkie ishte Edi Rama. Projekti dukej trendy në atë kohë, por nuk kaloi shumë dhe u kuptua që pllakat nuk ishin të përshtatshme për një rrugë ku kalonin mijëra makina.
Degradimi vazhdon prej vitesh. Pllakat lëvizin akoma më shumë kur ka shi dhe pas shumë riparimesh e arnimesh, korsitë e bulevardit kanë krijuar plasaritje, gropa, dhe gunga në të gjithë rrugën.
Lapsi.al sjell një pamje më të plotë sesi duket bulevardi nga të dy anët e pistës së biçikletave. Në pamjet e Lapsi.al shihet gjendja e mjerë e korsive të makinave, që janë lënë pas dore nga bashkia.
Sepse, nëse i duhet vënë një notë idesë së Erion Veliajt, është mirë të shihet i gjithë bulevardi. Prandaj më parë shikoni fotot dhe videon më poshtë, pastaj gjykoni vetë.©Përgatiti për Lapsi.al, Dorian Kodra
https://www.youtube.com/watch?v=XqH8ry74wfo&feature=youtu.be
