Presidenti i SHBA-ve, Donald Trump, deklaroi se Bashkimi Europian bën tregti ‘shumë të padrejtë’ me Shtetet e Bashkuara.
“Ne nuk mund të vendosim produktet tona brenda BE-së. Është shumë shumë e vështirë. Ata dërgojnë produkte te ne, pa taksa, apo shumë pak taksa”, - u shpreh Donald Trump në një intervistë për Piers Morgan.
Presidenti paralajmëroi unionin se kjo situatë do të ndryshojë, dhe në dëm të shteteve të BE-së.
Trump ka nisur një fushatë të ashpër ndaj ‘praktikave tregtare grabitqare’, siç i quan ai. Vendimi i para disa ditëve për të taksuar deri në 50% lavatriçet dhe panelet diellore që importohen në SHBA tronditi dy vendet prodhuese, Korenë e Jugut dhe Kinën.
Ndërsa në fjalën që mbajti në Forumin Ekonomik në Davos javën e kaluar, Trump vuri theksin tek politika e tij tregtare: “Amerika e para”. Presidenti, pa përmendur emra, u shpreh se kishte shumë shtete që përfaqësoheshin në këtë forum të cilat nuk zbatojnë praktika të duhura tregtare. Sipas Trump, tregtia me SHBA-në që tani e tutje duhet të jetë shumë korrekte dhe e drejtë. ©LAPSI.AL
