Ministria e Jashtme shqiptare dhe ajo greke shpërndanë një njoftim të përbashkët për shtyp në përfundim të bisedimeve tre-ditore te zhvilluara në Korçë.
Në deklaratë flitet për për përparim thelbësor drejt arritjes së zgjidhjeve të qëndrueshme për çështjet e pazgjidhura mes dy vendeve, por pa përmendur ndonjë prej zgjidhjeve të pretenduara.
Pritej që në përfundim të bisedimeve, sot të zhvillohej një deklaratë e përbashkët e ministrave për mediat, por dy delegacionet u mjaftuan me një njoftim për shtypin.
Njoftimi mbyllet duke theksuar se dialogu mes vendeve do të vazhdojë në muajt në vijim, çka lë të kuptojë se shefat e diplomacisë së Shqipërisë dhe Greqisë kanë akoma shumë çështje të lëna pezull dhe zgjidhjet duken ende përtej horizontit. ©LAPSI.AL
Njoftim i përbashkët i Ministrive të Punëve të Jashtme të Shqipërisë dhe Greqisë
(Korçë, 21 janar 2018)
Ministrat e Punëve të Jashtme të Shqipërisë dhe Greqisë, Ditmir Bushati dhe Nikos Kotzias, zhvilluan bisedime në Korçë më 19-21 janar 2018, duke u fokusuar në çështjet bilaterale.
Në vijim të takimit që u zhvillua në Kretë nëntorin e kaluar, të dyja ekipet bënë përparim thelbësor drejt arritjes së zgjidhjeve të qëndrueshme dhe afatgjata për çështjet e pazgjidhura, në përfitim reciprok të të dy vendeve dhe qytetarëve të tyre, në përputhje me vlerat dhe normat evropiane.
Diskutimet u zhvilluan në një atmosferë miqësore dhe konstruktive. Të dyja palët përsëritën angazhimin e tyre për të ndjekur më tej dialogun në të gjitha nivelet në muajt në vijim.
