Peshëngritësja Romela Begaj rrezikon medaljen e artë që mori në Kampionatin Botëror të mbajtur në SHBA në dhjetor të vitit të kaluar. Ajo ka rezultuar pozitive në testin antidoping.
Trajneri i peshëngritëses, Gazmend Hakcani, njëherësh edhe bashkëshorti i saj thotë se Romela nuk ka përdorur asnjë substancë të ndaluar, dhe se do të zhvillojë edhe testin B.
“Romela është e pastër dhe analizat janë të pastra. Kjo është diçka që bëhem me qëllim nga ndërkombëtarët. Kemi vendosur që të bëhet edhe testi B” – deklaroi Hakcani.
Kjo është hera e dytë që Romela Begaj del pozitive me stanozolol, teksa e njëjta situatë ka ndodhur edhe 4 vite më parë pas Botërorit të Kazakistanit. Në atë kohë ajo u pezullua për 2 vjet. Tani Begaj rrezikon 4 vite pezullim ose përjashtim përjetë nga sporti.
