Për të provuar akuzat që lëshon ndaj kryetarit të Partisë Demokratike, Jozefina Topalli solli në kujtesë një sfidë që Edi Rama i bëri Bashës në parlament.
Në një nga seancat e vitit të kaluar, Rama përmendi disa prej emrave më të fuqishëm në vend për të rrëzuar teorinë e Bashës se investimet në Tiranë janë investime të parave të drogës. Sipas Topallit, Basha uli kokën në parlament sepse ai është thjesht një bedel i qeverisë.
“Gjatë kësaj periudhe kemi parë të gjithë që Basha është bërë bedel i qeverisë dhe ortak i oligarkëve. Mjafton të kujtojmë pjesë nga seancat parlamentare të muajve të kaluar kur kryeministri i kërkon Bashës të flasë për emrat e oligarkëve dhe i përmend me emër dhe ky ul kokën dhe nuk guxon të thotë një fjalë.
Në këto kushte kur opozita kontrollohet nga qeveria për shkak të korruptimit dhe arsyeve te tjera të lidershipit te saj i bie që vendi ynë është në buzë të greminës se kështu bie demokracia dhe nuk ekziston më asnjë garanci për mbrojtjen e të drejtave të njeriut”, tha Jozefina Topalli në një intervistë për Report Tv.
Partia Demokratike përgatitet për një protestë në 27 Janar që merr shkas nga emërimi i Arta Markut dhe kapja e drejtësisë nga Rama.
